My Daily Strength

தேவனுடைய அதிகாரம் -- Rev. Dr. ஜெ. சாமுவேல் சுதாகர்

இன்றைய தியானம் : 'சகல பிசாசுகளையும் துரத்தவும் ... அவர்களுக்கு வல்லமையும் அதிகாரமும் கொடுத்து' லூக்கா 9:1

தேவன் தம்முடைய நோக்கத்தை நிறைவேற்றும்படி ஒருவனை அழைக்கும்போது, சகல பிசாசுகளையும் துரத்தவும் ஜனங்களின் வாழ்க்கையில் காணப்படும் வியாதிகளைக் குணமாக்கவும் வலிகள் மற்றும் வேதனைகளை நீக்கவும் தேவையான வல்லமையையும் அதிகாரத்தையும் அவனுக்குக் கொடுத்து அவனைத் தகுதிப்படுத்தி அனுப்புகிறார். எப்பக்கத்திலிருந்தும் ஜனங்களின் வாழ்க்கையில் பிரச்சனைகளையும் குழப்பங்களையும் கொண்டு வரும் பிசாசின் தந்திரமான கிரியைகளை எதிர்த்துப் போரிடும்படி தேவன் தம்முடைய பிள்ளைகளுக்கு அதிகாரத்தைக் கொடுத்து தம்முடைய நாமத்தினால் அந்தகாரக் கிரியைகளைக் கட்டி ஜனங்களை விடுவிக்கும்படி பெலப்படுத்துகிறார். தேவ குமாரனாகிய இயேசு கிறிஸ்து மனிதனாய் இப்பூமியில் மூன்றரை ஆண்டுகள் ஊழியம் செய்தபோது தம்முடைய சீடர்களுக்குப் பயிற்சியளித்து, இரண்டிரண்டு பேராக அவர்களை அனுப்பினார். சர்ப்பங்களையும் தேள்களையும் மிதிக்கவும் சந்துருவின் சகல வல்லமைகளையும் மேற்கொள்ளவும் அவர்களுக்கு அதிகாரம் கொடுத்தனுப்பினார். தேவனுடைய இராஜ்ஜியத்தை ப் பிரசங்கிக்கிற அதே வேளையில் பிணியாளிகளை க் குணமாக்கவும் பிசாசின் பிடியிலுள்ளோரை விடுவிக்கவும் செய்தார்.

கர்த்தர் தம்முடைய சீடர்களுக்குப் பயன்படுத்தத் துவங்கினார். அவர்கள் மகிழ்ச்சியுடன் திரும்பி வந்து தங்கள் மூலமாய்க் கர்த்தர் செய்த மகிமையான கிரியைகளை அவருக்கு அறிவித்தார்கள். இந்த கடைசிநாட்களிலுங்கூட பிசாசானவன் கெர்ச்சிக்கிற சிங்கத்தைப் போலவும் சர்ப்பத்தைப் போலவும் தேவ பிள்ளைகளை விழுங்கலாமோவென்று வகை தேடிச் சுற்றித் திரிகிறான். கர்த்தர் உங்களுக்குச் சர்ப்பங்களையும் தேள்களையும் மிதிக்கவும் சந்துருவின் சகல வல்லமைகளையும் மேற்கொள்ள அதிகாரத்தையும் கொடுத்திருக்கிறார். அவைகள் ஒன்றாகிலும் உங்களைச் சேதப்படுத்தமாட்டாது. அசுத்த ஆவிகள் சீடர்களுக்குக் கீழ்ப்படிகிறதை நினைத்து அவர்கள் சந்தோஷப்படாமல் பரலோகத்தில் அவர்களுடைய பெயர்கள் எழுதியிருக்கிறதை நினைத்து சந்தோஷப்படும்படி அவர்களை எச்சரித்து தேவனுக்கு மகிமையைச் செலுத்தும்படி கூறினார்.

அன்பானவர்களே, தேவன் உங்களையும் பயன்படுத்த விரும்புகிறார். ஆனால் உங்கள் வாழ்க்கையை அவருடைய கரங்களில் ஒப்புக்கொடுத்து பாவங்களிலிருந்து மன்னிப்பைப் பெற்று பரிசுத்தமாய் வாழும்படி அர்ப்பணியுங்கள். அப்பொழுது தேவ இராஜ்ஜியத்தைக் குறித்த பாரம் உங்களுக்குள் மேலோங்கும். அவருடைய பார்வையில் கிருபையைப் பெற்றுக் கொள்ளுவீர்கள். எனவே இன்றே அவருக்கு உங்களை ஒப்புக்கொடுத்து அவருடைய நோக்கத்திற்காகப் பயன்படும் பாத்திரமாய் மாறுங்கள்.

ஜெபம் : கர்த்தாவே எனக்கு கொடுக்கும் அதிகாரத்திற்காக உமக்கு நன்றி, ஆமென்.


சிந்திக்க : தேவனுடைய வல்லமையும் அதிகாரமும் நமக்கும் அளிக்கப்பட்டுள்ளன.